有無發現自己呢排面對疫情，心中感到壓力同有種無力感？又或者防疫動力減低，出現鬆懈例如偶爾除低口罩、少咗消毒雙手？呢啲都可能係抗疫疲勞嘅表現。

導致抗疫疲勞有兩個因素。第一，疫情消耗大量身心能量。最初面對疫情威脅時，身體同腦部會作出相應反應，令人變得警覺，專注環境威脅，提醒自己做足防疫措施。呢啲係我哋嘅求生本能，但長期下去則會令身心疲勞。加上疫情大大改變生活習慣，影響精神，防疫措施亦可能開始做得無咁充足。

第二個因素係資訊超載。當我哋反覆接收相似資訊時，腦部最初可能會因為見到威脅而作出強烈反應。但久而久之，反應會逐漸減少，對同樣嘅訊息嘅反應無一開始咁大，從而令人變得鬆懈。

資料來源：香港紅十字會